ကျန်းမာရေးနှင့်အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး မှ လူထုအားကစားလှုပ်ရှားမှုများကို တစ်နိုင်ငံလုံးအတိုင်းအတာဖြင့် ပုံမှန်ပြုလုပ်နိုင်ရေး လုပ်ငန်းညှိနှိုင်းအစည်းအဝေးသို့ တက်ရောက်

နေပြည်တော်၊ (၂၀၂၀) ပြည့်နှစ်၊ ဩဂုတ်လ (၁၀) ရက်နေ့။

ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီးဒေါက်တာမြင့်ထွေးသည်ပညာရေးဝန်ကြီးဌာန၊ ပြည်ထောင်စုဝန်ကြီးဒေါက်တာမျိုးသိမ်းကြီးနှင့် အတူ ယနေ့၊ နံနက်ပိုင်းတွင် ကျန်းမာရေးနှင့်အားကစားဝန်ကြီး ဌာန၊ ရုံးအမှတ် (၄)၊ နေပြည်တော်၌ ပြုလုပ်ခဲ့သည့် "လူထုအားကစား လှုပ်ရှားမှုများကို တစ်နိုင်ငံလုံးအတိုင်းအတာဖြင့် အရှိန်အဟုန်မြှင့်တင်ကာ ပုံမှန်ပြုလုပ်နိုင်ရေး လုပ်ငန်းညှိနှိုင်းအစည်းအဝေး" သို့ တက်ရောက်ခဲ့ပါသည်။

ရှေးဦးစွာ Advisory Board for Exercise is Medicine (EIM) Myanmar National Center ၏ ဥက္ကဋ္ဌပြည်ထောင်စုဝန်ကြီးဒေါက်တာမြင့်ထွေးကအမှာစကားပြောကြားရာတွင် -

• ကျန်းမာရေးနှင့်အားကစားဝန်ကြီးဌာနသည် အားကစားကဏ္ဍတွင် နိုင်ငံတကာအားကစားပြိုင်ပွဲများတွင် အောင်နိုင်ရေးအတွက်သာမကပိုမိုအရေးကြီးသည့် တစ်မျိုးသားလုံးကျန်းမာကြံ့ခိုင်ရေးအတွက် လုပ်ငန်း မဟာဗျူဟာများ ချမှတ်ဆောင်ရွက်လျက်ရှိရာ "ကိုယ်လက်လှုပ်ရှားဆေးတစ်ပါး (exercise is medicine)"အစီအစဉ်ဖြင့် ဆောင်ရွက်လျက်ရှိပါကြောင်း၊
• ပြည်သူများ ကိုယ်လက်လှုပ်ရှားအားကစား လေ့ကျင့်မှုကို စိတ်ပါဝင်စားစွာဖြင့် ပါဝင်လုပ်ဆောင်လာပြီး ရေရှည်တွင် "ကိုယ်လက်လှုရှားအားကစားလေ့ကျင့်မှုအလေ့အထနှင့် ယဉ်ကျေးမှုထုံးစံ (habit and culture)" အဖြစ် လျင်မြန်စွာ ဖြစ်တည်လာစေရေးအတွက် လုပ်ငန်းစဉ်အမျိုးမျိုးကို ချမှတ်ဆောင်ရွက်လျက်ရှိပါကြောင်း၊
• ထိုသို့ဆောင်ရွက်ရာ၌ ယခင်က လူထုအားကစားလှုပ်ရှားမှုများကို နှစ်စဉ် ဒီဇင်ဘာလတွင်သာပြုလုပ်ခဲ့ရာမှ တစ်နိုင်ငံလုံး အတိုင်းအတာဖြင့် ပုံမှန်ကျင်းပရန် သင့်လျော်သည့် နေ့ရက်များ တရားဝင် သတ်မှတ်ပေးနိုင်ရေး အတွက် ယနေ့အစည်းအဝေးတွင် ဝိုင်းဝန်းအကြံပြုကြစေလိုပါကြောင်း၊
• ကျောင်းနေအရွယ် လူငယ်များတွင် ကိုယ်လက်လှုပ်ရှားအားကစား လေ့ကျင့်မှု အလေ့အထကောင်းများ သန္ဓေတည်ဖြစ်ထွန်းလာပါက အဆိုပါအလေ့အထကောင်းများသည် ၎င်းတို့၏ မိဘများ၊ ဆွေမျိုးများနှင့် မိတ်ဆွေသူငယ်ချင်းများထံ ထပ်ဆင့်ပြန့်ပွားလာနိုင်မည်ဖြစ်ပါကြောင်း၊
• ပညာရေးဝန်ကြီးဌာနနှင့် မိမိတို့ဝန်ကြီးဌာနရှိ တက္ကသိုလ်များတွင် ကိုယ်လက်လှုပ်ရှားအားကစားအစီအစဉ်များကို ကျယ်ကျယ်ပြန့်ပြန့်လုပ်ဆောင်ခြင်းဖြင့် အားကစားလေ့ကျင့်မှုဖြင့် ကျန်းမာကြံ့ခိုင်သည့် လူအုပ်စု (healthy population) များပြားလာမည်ဖြစ်ပါကြောင်း၊
• စာသင်ကျောင်းများနှင့် တက္ကသိုလ်များတွင် "ကိုယ်လက်လှုပ်ရှားဆေးတစ်ပါး" လုပ်ငန်းများဆောင်ရွက်ရာတွင် ပညာရေးဝန်ကြီးဌာနနှင့် ကျန်းမာရေးနှင့်အားကစားဝန်ကြီးဌာနတို့ ပူးပေါင်းလက်တွဲကာ ဆက်လက် ဆောင်ရွက်သွားမည် ဖြစ်ပါကြောင်း၊
• ကိုယ်လက်လှုပ်ရှားအားကစား လေ့ကျင့်ခြင်းဖြင့် ရောဂါများ အထူးသဖြင့် မကူးစက်တတ်သောရောဂါများ ဖြစ်ပွားခြင်းကို ကာကွယ်နိုင်မှုနှင့် ရောဂါ၏ ပြင်းထန်မှုကို လျှော့ချနိုင်မှုစသည့် ကိုယ်ခန္ဓာပိုင်း (ရုပ်ပိုင်း) ဆိုင်ရာ ကျန်းမာစေမှုများအပြင် စိတ်ပိုင်းနှင့် စိတ်ခံစားမှုပိုင်းဆိုင်ရာ အကျိုးကျေးဇူး(mental and emotional benefit) များ ရရှိနိုင်မှုများကိုလည်း ပြည်သူများ ကျယ်ကျယ်ပြန့်ပြန့် သိရှိစေရေး ဆောင်ရွက်ရမည် ဖြစ်ပါကြောင်း၊
• ပြည်သူများ ကိုယ်လက်လှုပ်ရှားအားကစား လေ့ကျင့်မှုကို မိမိ၏ နေအိမ်တွင်ပင် လွယ်ကူစွာပြုလုပ်နိုင်ရန်အတွက် အားကစားလေ့ကျင့်မှုပုံစံ ပြသမှုများကို အင်တာနက်၊ ရုပ်မြင်သံကြားနှင့် ရေဒီယိုများတွင် ယခုထက် ပိုမို၍ ကျယ်ကျယ်ပြန့်ပြန့် ထုတ်လွှင့်စေလိုပါကြောင်း၊
• ပြည်သူများ ကိုယ်လက်လှုပ်ရှားအားကစား လေ့ကျင့်မှု ဆောင်ရွက်ရာတွင် လက်လှမ်းမီ အသုံးပြုနိုင်ရေးအတွက် ကျန်းမာရေးနှင့်အားကစားဝန်ကြီးဌာနမှ ကျန်းမာကြံ့ခိုင်ရေးကိရိယာ (Outdoor fitness equipment)များကို တိုင်းဒေသကြီး/ ပြည်နယ်များရှိ မြို့နယ်အသီးသီးတွင် ကျယ်ကျယ်ပြန့်ပြန့် တပ်ဆင်လျက်ရှိပြီး ဆက်လက်၍လည်း တပ်ဆင်သွားမည်ဖြစ်ပါကြောင်း၊
• အားကစားနှင့်ကာယပညာဦးစီးဌာနသည် "ကိုယ်လက်လှုပ်ရှားဆေးတစ်ပါး"ဆိုင်ရာ ကမ္ဘာ့အဖွဲ့အစည်း (Exercise is medicine global center)၊ ဒေသဆိုင်ရာအဖွဲ့အစည်း (Exercise is medicine regional center)တို့နှင့် အပြန်အလှန် ဆက်သွယ်ပူးပေါင်း ဆောင်ရွက်မှုများကိုလည်း အဆက်မပြတ် ဆက်လက်လုပ်ဆောင်သွားမည်ဖြစ်ပါကြောင်း၊
• ဝန်ကြီးဌာနများ၏ ရုံးဌာနအသီးသီးတွင် ကိုယ်လက်လှုပ်ရှား လေ့ကျင့်မှုများကို ပုံမှန်ပြုလုပ်ကာ အားကစားပြုလုပ်သည့် အလေ့အထပျိုးထောင်ရေး ဆောင်ရွက်သွားမည်ဖြစ်ပါကြောင်း၊
• "ကိုယ်လက်လှုပ်ရှားဆေးတစ်ပါး" အစီအစဉ်ဖြင့် တစ်မျိုးသားလုံး ကျန်းမာကြံ့ခိုင်စေရေးအတွက် ရေတိုအတွက်မဟုတ်ဘဲ ရေရှည်တည်တံ့မည့် လုပ်ငန်းစဉ်များ၊ လုပ်ငန်းမူဘောင်များ ချမှတ်ဆောင်ရွက် ကြရမည်ဖြစ်ပါကြောင်း၊
• လုပ်ငန်းများ ဆောင်ရွက်မှု ပိုမိုထိရောက်မှုရှိစေရေးအတွက် တိုင်းဒေသကြီး/ ပြည်နယ် လုပ်ငန်းအဖွဲ့များကို လိုအပ်သလို ဖွဲ့စည်းဆောင်ရွက်သွားရမည်ဖြစ်ပါကြောင်း ပြောကြားခဲ့ပါသည်။

ထို့နောက် Advisory Board for Exercise is Medicine (EIM) Myanmar National Center ၏ ဒုတိယဥက္ကဋ္ဌပြည်ထောင်စုဝန်ကြီးဒေါက်တာမျိုးသိမ်းကြီးက အမှာစကားပြောကြားရာတွင် -

• ကိုယ်လက်လှုပ်ရှားအားကစား လေ့ကျင့်မှုများကို လူထုလှုပ်ရှားမှုအသွင်ဖြင့် ဆောင်ရွက်ရာတွင် ယခု COVID-19 ဖြစ်ပွားနေသောကာလနှင့် COVID-19 အလွန်ကာလများတွင် ပြောင်းလဲလာသည့် နေထိုင်မှုပုံစံသစ်များနှင့် အညီ ဆောင်ရွက်ရမည့် အစီအစဉ်များကို ချမှတ်ကြရမည်ဖြစ်ပါကြောင်း၊
• ပညာရေးဝန်ကြီးဌာနအနေဖြင့် စာသင်ကျောင်းများတွင် ကာယပညာ သင်ကြားလေ့ကျင့်မှုဆိုင်ရာ သင်ခန်းစာများကို သင်ရိုးညွှန်တမ်းသစ်တွင် ထည့်သွင်းရေးဆွဲဆောင်ရွက်လျက်ရှိပါကြောင်း၊
• ကိုယ်လက်လှုပ်ရှားအားကစား လေ့ကျင့်ခြင်းဖြင့် ကိုယ်ကာယဖွံ့ဖြိုးမှုအပြင် ဦးနှောက်ဉာဏ်ရည်ဖွံ့ဖြိုးမှု၊ စိတ်ခံစားမှုပိုင်းဆိုင်ရာနှင့် လူမှုဆက်ဆံရေးဆိုင်ရာ ဖွံ့ဖြိုးမှုများကိုပါ ရရှိစေပြီး သင်ကြားသင်ယူမှုကို များစွာ အထောက်အကူပြုသဖြင့် ထူးချွန်ထက်မြက်သောကျောင်းသား/သူများ ဖြစ်စေရေးအတွက် ကိုယ်လက်လှုပ်ရှားအားကစား လေ့ကျင့်မှုများသည် များစွာအရေးကြီးပါကြောင်း၊
• အားကစား လေ့ကျင့်မှုပုံစံ ပြသမှုများကို အင်တာနက်၊ ရုပ်မြင်သံကြားနှင့် ရေဒီယိုများတွင် ထုတ်လွှင့်နေခြင်းမှာ ကောင်းမွန်ပြီး ပညာရေးဝန်ကြီးဌာနမှ ထူထောင်ထားသော "Myanmar Digital Education Platform" တွင်လည်း ထည့်သွင်းထုတ်လွှင့်သွားမည်ဖြစ်ပါကြောင်း၊
• ပညာရေးဝန်ကြီးဌာနအနေဖြင့် စာသင်ကျောင်းနှင့် တက္ကသိုလ်များတွင် ကိုယ်လက်လှုပ်ရှားအားကစား အစီအစဉ်များဆောင်ရွက်ရာတွင် ကျန်းမာရေးနှင့်အားကစားဝန်ကြီးဌာနနှင့် ပူးပေါင်းဆောင်ရွက်သွားမည် ဖြစ်ပါကြောင်း ပြောကြားခဲ့ပါသည်။

ဆက်လက်၍ ကျန်းမာရေးနှင့်အားကစားဝန်ကြီးဌာန၊ ဒုတိယဝန်ကြီးဒေါက်တာမြလေးစိန်က Advisory Board for Exercise is Medicine (EIM) Myanmar National Center ၏ ပထမအကြိမ် အစည်းအဝေး ဆုံးဖြတ်ချက်များနှင့် ပတ်သက်၍ ဆောင်ရွက်ထားရှိမှု အခြေအနေများအား ရှင်းလင်းတင်ပြပါသည်။

ထို့နောက် ပညာရေးဝန်ကြီးဌာန၊ ဒုတိယဝန်ကြီးဦးဝင်းမော်ထွန်းမှ ပညာရေးဝန်ကြီးဌာနအနေဖြင့် အားကစားနှင့် ပညာရေးပေါင်းစပ်၍ ကာယပညာသင်ရိုးများ(Physical Fitness) ထည့်သွင်းထားရှိမှု အခြေအနေများကို ရှင်းလင်းပြောကြားခဲ့ပြီး လူထုအားကစားလှုပ်ရှားမှုများကို နိုင်ငံတစ်ဝှမ်းလုံး ပုံမှန်ကျင်းပနိုင်ရေး အကြံပြုချက်များ ပေးအပ်ခဲ့ပါသည်။

ဆက်လက်၍ EIM Myanmar National Technical Committee မှ ကျွမ်းကျင်သူ ဒေါက်တာရဲတင့်လွင်က ကော်မတီ၏ (၂၀၁၉) ခုနှစ် ဇွန်လမှ (၂၀၂၀) ခုနှစ် ဇွန်လအထိ ကာလအတွင်း လုပ်ငန်းဆောင်ရွက်မှု အခြေအနေများနှင့် ရှေ့လုပ်ငန်းစဉ်များအား တင်ပြခဲ့ပါသည်။      

ထို့နောက် အခမ်းအနား တက်ရောက်လာကြသော Advisory Board for Exercise is Medicine (EIM) Myanmar National Center၏ အဖွဲ့ဝင်များဖြစ်ကြသောပညာရေးဝန်ကြီးဌာနနှင့် ကျန်းမာရေးနှင့် အားကစားဝန်ကြီးဌာနတို့မှ အမြဲတမ်းအတွင်းဝန်၊ ညွှန်ကြားရေးမှူးချုပ်များနှင့် တာဝန်ရှိသူများက တစ်နိုင်ငံလုံး အတိုင်းအတာဖြင့် လူထုအားကစားလှုပ်ရှားမှုများကို ပုံမှန်ကျင်းပရန်၊ ဝန်ကြီးဌာနအသီးသီးရှိ ရုံးများတွင် ကိုယ်လက်လှုပ်ရှားအားကစားကို ပုံမှန်ဆောင်ရွက်ရန်နှင့် ယခု COVID-19 ဖြစ်ပွားနေစဉ် ကာလအတွင်း ပြုလုပ်သင့်သည့် လေ့ကျင့်ခန်းအစီအစဉ်များ၊ လူထုအားကစား လှုပ်ရှားမှုများကို နိုင်ငံတစ်ဝန်းလုံး၌ ပုံမှန်ကျင်းပနိုင်ရေးတို့နှင့် ပတ်သက်၍ ဝိုင်းဝန်းအကြံပြုဆွေးနွေးကြပါသည်။

အဆိုပါ အစည်းအဝေးသို့ Advisory Board for Exercise is Medicine (EIM) Myanmar National Center  ဥက္ကဋ္ဌ၊ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီးဒေါက်တာမြင့်ထွေး၊ ဒုတိယဥက္ကဋ္ဌ၊ ပညာရေးဝန်ကြီးဌာန၊ ပြည်ထောင်စုဝန်ကြီးဒေါက်တာမျိုးသိန်းကြီးနှင့် အဖွဲ့ဝင်များဖြစ်ကြသော ကျန်းမာရေးနှင့်အားကစားဝန်ကြီးဌာန၊ ဒုတိယဝန်ကြီးဒေါက်တာမြလေးစိန်၊ ပညာရေးဝန်ကြီးဌာန၊ ဒုတိယဝန်ကြီးဦးဝင်းမော်ဦး၊ ကျန်းမာရေးနှင့် အားကစားဝန်ကြီးဌာန၊ အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်း၊ ကျန်းမာရေးလူ့စွမ်းအားအရင်းအမြစ်ဦးစီးဌာန ညွှန်ကြားရေးမှူးချုပ် ဒေါက်တာတင်တင်လေး၊ အဆင့်မြင့်ပညာဦးစီးဌာန၊ ညွှန်ကြားရေးမှူးချုပ် ဒေါက်တာသိန်းဝင်း၊ အခြေခံပညာဦးစီးဌာန၊ ညွှန်ကြားရေးမှူးချုပ် ဦးကိုလေးဝင်း၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်နှင့် တာဝန်ရှိသူများတက်ရောက်ခဲ့ကြသည်။