နေပြည်တော်၊ ဒီဇင်ဘာလ(၁၉)ရက်။
ကျန်းမာရေးနှင့်အားကစားဝန်ကြီးဌာနနှင့်မြန်မာနိုင်ငံ အမျိုးသမီးအားကစားအဖွဲ့ချုပ်တို့ ပူးပေါင်းကျင်းပသော ''Healthy and Happy Life in the New Normal Era'' ဆွေးနွေးပွဲကို ကျန်းမာရေးနှင့်အားကစားဝန်ကြီးဌာနရုံးအမှတ်(၄)၌ ယနေ့နံနက် (၁၀:၀၀)နာရီအချိန်၌ Video Conferencing စနစ်ဖြင့် ကျင်းပရာ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး၊ ဒုတိယဝန်ကြီးဒေါက်တာမြလေးစိန်၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်၊ ဒုတိယညွှန်ကြားရေးမှူးချုပ်များဖြစ်ကြသော ဦးထွန်းမြင့်ဦး၊ ဦးကျော်ဆန်း၊ ဦးကျော်ဦးနှင့် တာဝန်ရှိသူများ၊ မြန်မာနိုင်ငံအမျိုးသမီးအားကစားအဖွဲ့ချုပ် ဥက္ကဌ ဒေါ်ခင်လေး၊ ဒုတိယဥက္ကဌ ဒေါ်ရီရီဝင်း၊ မြန်မာနိုင်ငံ အမျိုးသမီးအားကစားအဖွဲ့(ကရင်)ဆပ်ကော်မတီခေါင်းဆောင် ဒေါက်တာသီသီဝင်း၊ ကျန်းမာရေးနှင့်အားကစားဝန်ကြီးဌာန (ကျွမ်းကျင်သူ) ဒေါက်တာရဲတင့်လွင်၊ အားကစားနှင့်ကာယပညာဦးစီးဌာန (စစ်ကိုင်းတိုင်း) ညွှန်ကြားရေးမှူး ဦးကျော်မင်းသန်းနှင့် တိုင်းဒေသကြီးနှင့်ပြည်နယ်များမှ တာဝန်ရှိသူများတက် ရောက်ခဲ့ကြပါသည်။
ဆက်လက်၍ ကျန်းမာရေးနှင့်အားကစားဝန်ကြီးဌာန ဒုတိယဝန်ကြီး၊ မြန်မာနိုင်ငံအမျိုးသမီး အားကစားအဖွဲ့ချုပ် နာယက ဒေါက်တာမြလေးစိန်မှ ပြောကြားရာတွင် မြန်မာနိုင်ငံ အမျိုးသမီး အားကစားအဖွဲ့ချုပ်သည် ၁၉၉၀ခုနှစ်မှ ယနေ့အထိ နှစ်ပေါင်း(၃၀)တိုင် ရပ်တည်လာနိုင်ခဲ့ပြီး ဥက္ကဌများ၊ အမှုဆောင်များ ပြောင်းလဲသည့်တိုင် မြန်မာနိုင်ငံ အမျိုးသမီး အားကစားအဖွဲ့ချုပ်၏ ရည်ရွယ်ချက်ဖြစ်သော အမျိုးသမီးများ၊ မိခင်များ၊ အမျိုးသမီး အားကစားသမားများ၏ အကျိုးဖြစ်ထွန်းစေသော ကိုယ်ခန္ဓာနှင့် စိတ်ဓါတ်များ ကျန်းမာ သန်စွမ်းစေသော မြှင့်တင်ဆောင်ရွက် လှုပ်ရှားမှုများကို ယခင်ကထက် ပိုမို အရှိန်အဟုန်မြင့် လုပ်ဆောင်နိုင်ခဲ့ပါကြောင်း၊ ယခုCovid-19 ကာလတွင်လည်း ယခင်ကာလများမှ ဖြစ်ပွားခဲ့သော ရောဂါဗေဒများ ဖြတ်ကျော်ခဲ့ပြီးသည့် အတွေ့အကြုံကောင်းများကို အသုံးချပြီး New Normal Life ကိုကျင့်သုံးနေထိုင်ရန် လိုအပ်ပါကြောင်း၊ ထိုသို့နေထိုင်ရာတွင် လူတိုင်းသည် ကျန်းမာကြံ့ခိုင်ပြီး စိတ်ဓာတ်အာဟာရ မျှတ ဖွံ့ဖြိုးနေထိုင်ရန် လိုအပ်ပါကြောင်း၊ ယခုကဲ့သို့သော အခြေအနေတွင် ကိုယ်ခံအားစနစ် ကောင်းမွန်အောင် အဓိက လုပ်ဆောင်ရမည်ဖြစ်ပါကြောင်း၊ ထိုသို့လုပ်ဆောင်ရမည့်အချက်တွင် ကိုယ်လက် လှုပ်ရှားလေ့ကျင့်ခန်းများဖြင့်သာ ပြုလုပ်နိုင်မည်ဖြစ်ပါကြောင်း၊ ကိုယ်လက်လှုပ်ရှား ဆေးတစ်ပါး (EIM) သည် မိမိတို့ ကျန်းမာရေးနှင့် အားကစား ဝန်ကြီးဌာနနှင့် မြန်မာနိုင်ငံအမျိုးသမီး အားကစား အဖွဲ့ချုပ်ကသာ ဆောင်ရွက်နေသည်မဟုတ်ပဲ UN ၊ WHO ၊ IOC ကဲ့သို့ ကမ္ဘာ့အဖွဲ့အစည်းများနှင့် သက်ဆိုင်ရာ အဖွဲ့အစည်းကြီးများမှပါ ကျယ်ကျယ်ပြန့်ပြန့် တွင်ကျယ်စွာ ကမ္ဘာအနှံ့၌ ဆောင်ရွက်နေပါကြောင်း၊ မြန်မာနိုင်ငံအတိုင်းအတာဖြင့် လှုပ်လှုပ်ရှားရှား လူထုအားကစားပြိုင်ပွဲကို ကျင်းပခဲ့သည်မှာ ယခုဆိုရင် အဆင့်(၄)သို့ရောက်ရှိနေပြီဖြစ်ပါကြောင်း၊ ထိုလှုပ်လှုပ်ရှားရှား လူထုအားကစားပြိုင်ပွဲသည်လည်း ပြိုင်ပွဲ အသွင် မဟုတ်ပဲ တစ်နိုင်ငံလုံး အတိုင်းအတာထိ ပြည်သူများ ပါဝင်လာမှုကို အဓိကထား ဆောင်ရွက်နေပြီ ဖြစ်ပါကြောင်း၊ ကိုယ်လက်လှုပ်ရှား လေ့ကျင့်ခန်း အားကစားကို မဖြစ်မနေ လုပ်ဆောင်ရမည့် အလေ့အကျင့် ဝါသနာအစွဲတစ်ခုကဲ့သို့ ဖြစ်လာစေရန် လိုအပ်ပါကြောင်း၊ ထိုမှသာ New Normal Life Era တွင် အပြုအမူ၊ နေထိုင်မှုပုံစံ၊ ခံယူချက်များ ပြောင်းလဲပြီး ကျန်းမာသန်စွမ်းပြီး စိတ်ဓါတ်ခိုင်မာသော နေထိုင်မှုမျိုး နေထိုင်လာနိုင်မည်ဖြစ်ပါကြောင်း ပြောကြားခဲ့ပါသည်။
မြန်မာနိုင်ငံအမျိုးသမီးအားကစားအဖွဲ့ချုပ် ဥက္ကဌ ဒေါ်ခင်လေးမှ မြန်မာနိုင်ငံ အမျိုးသမီးအားကစားအဖွဲ့၏ ရည်မှန်းချက်များ၊ ရည်ရွယ်ချက်များ၊Covid-19ကာလ မတိုင်မီ အဖွဲ့၏ ဆောင်ရွက်နိုင်မှုများ၊ လတ်တလော ဆောင်ရွက်ချက်များနှင့် ရှေ့ဆောင်ရွက်လုပ်ဆောင်မည့် တိုင်းဒေသကြီးနှင့်ပြည်နယ်၊ ဌာနဆိုင်ရာများ၊ ပြည်သူများနှင့် ပူးပေါင်း၍ ကိုယ်လက်လှုပ်ရှားအားကစားဖွံ့ဖြိုးတိုးတက်ရေးအကြောင်းများကို ဆွေးနွေးခဲ့ပါသည်။
ကျန်းမာရေးနှင့်အားကစားဝန်ကြီးဌာန (ကျွမ်းကျင်သူ)ဒေါက်တာရဲတင့်လွင်မှ Stay at Home Covid-19 ကာလအတွင်း လူမှုနေထိုင်မှု ပုံစံအသစ်တွင် ကိုယ်လက်လှုပ်ရှား အားကစား ပြုလုပ်ခြင်းဖြင့် ရရှိနိုင်မည့် အကျိုးကျေးဇူးများ၊ လေ့ကျင့်ခန်း ပြုလုပ်ရာတွင် ကိုယ်ဝန်ဆောင်အမျိုးသမီးများ၊ အသက်အရွယ်ကြီးရင့်သူများ မီးဖွားပြီး ပြုလုပ်သင့်သော အေရိုးဗစ် ၊ လမ်းလျှောက်ကဲ့သို့သော တစ်ကိုယ်လုံး လှုပ်ရှားမှုရှိပြီး အတန်အသင့် ပြင်းထန်မှုရှိသော လေ့ကျင့်ခန်းမျိုးကို တစ်ပတ်လျှင် မိနစ်(၁၅၀)ခန့် လုပ်ဆောင်ရန်လိုအပ်ကြောင်း၊ အရွယ်ရောက်ပြီး လူငယ်/လူရွယ်များတွင် ပြုလုပ်သင့်သော ကြိုးခုန်ခြင်း၊ ကြွက်သား သန်မာမှု လေ့ကျင့်ခန်းများကဲ့သို့ ပြင်းထန်မှုရှိသောလေ့ကျင့်ခန်းများ၊ စိတ်ဖိစီးမှုကို လျော့ချ စေနိုင်သော စိတ်ပိုင်းဆိုင်ရာ လေ့ကျင့်ခန်းများ၊ အဟာရမျှတစွာ နေထိုင်စားသောက်မှုများအကြောင်း၊ လေ့ကျင့်ခန်းများပြုလုပ်ရာတွင် ထိရောက်မှုရှိသော လေ့ကျင့်ခန်းများ ဖြစ်စေရန်အတွက် ပုံမှန်ပြုလုပ်ရမည့် လေ့ကျင့်ခန်းအကြောင်းများကို ဆွေးနွေးပြောကြားခဲ့ပါသည်။
အားကစားနှင့်ကာယပညာဦးစီးဌာန(စစ်ကိုင်းတိုင်း) ညွှန်ကြားရေးမှူး ဦးကျော်မင်းသန်းမှ Stay at Home ကာလတွင် ပြုလုပ်ခဲ့သည့် အားကစားလှုပ်ရှားမှု အခြေအနေများ၊ Online တစ်ကိုယ်ရည် ဘောလုံးစွမ်းရည်၊ ခြင်းလုံးစွမ်းရည် ပြိုင်ပွဲများအကြောင်း ရှေ့ဆောင်ရွက်မည့် အားကစား လှုပ်ရှားမှုများအကြောင်း၊ New Normal Life Era ဆောင်ရွက်မည့် အားကစားကွင်း/ရုံ ပြင်ဆင်ထားမှုများ အကြောင်းစသည်တို့ကို ဆွေးနွေးပြောကြားခဲ့ပါသည်။
မြန်မာနိုင်ငံအမျိုးသမီးအားကစားအဖွဲ့ (ကရင်)ဆပ်ကော်မတီခေါင်းဆောင် ဒေါက်တာတီတီဝင်းမှ ကရင်ပြည်နယ်အတွင်း ကိုယ်လက်လှုပ်ရှား အားကစားလေ့ကျင်းခန်း ဆောင်ရွက်မှု များနှင့် ပတ်သက်၍ ရရှိနိုင်သော အကျိုးကျေးဇူးများ၊ ရောဂါကုသရာတွင် လူနာများအတွက် ကိုယ်လက်လှုပ်ရှား လေ့ကျင့်ခန်းမျှဝေပေးနေမှုများ၊ Physical Fitness Dance ပြုလုပ်ခြင်းဖြင့် လူတန်းစားမရွေး ပြုလုပ်နိုင်ပြီး ကုန်ကျစရိတ် သက်သာသော အားကစားနည်းဖြစ်သည့်အတွက် (EIM) ပိုမိုအသက်ဝင် လှုပ်ရှားမှုရှိစေရန် ဆောင်ရွက်ခဲ့သည့် အကြောင်းအရာများကို ဆွေးနွေးပြောကြားခဲ့ပါသည်။
ကျန်းမာရေးနှင့်အားကစားဝန်ကြီးဌာန ဒုတိယဝန်ကြီးဒေါက်တာမြလေးစိန်မှ သုံးသပ်ပြောကြားရာတွင် ယခုကာလတွင် အားကစားလှုပ်ရှားမှု အသိပညာပေး လုပ်ငန်းများ ဆောင် ရွက်ရာတွင် ဆက်သွယ်ရေး၊ ပြန်ကြားရေးဝန်ကြီးဌာနများနှင့် ပူးပေါင်း၍ ပိုမိုလုပ်ဆောင်ရန် လိုအပ်ပါကြောင်း၊ Online ပြိုင်ပွဲများ ပြုလုပ်ရာတွင် အသက်အရွယ်ပေါင်းစုံ ပါဝင်နိုင်ရန် သက်ဆိုင်ရာ အသက်အရွယ်အလိုက် ပြိုင်ပွဲများ ပြုလုပ်ရန် လိုအပ်ပါကြောင်း၊ ကျန်းမာသန်စွမ်းသော ကလေးသူငယ်များ ဖြစ်ပေါ်လာစေရေးအတွက် အားကစားလှုပ်ရှားမှုများ ပြုလုပ်ရာတွင် မသန်စွမ်း ကလေးသူငယ်များအတွက်ပါ ထည့်သွင်းစဉ်းစားကျင်းပပေးရန် လိုအပ်ကြောင်း ပြောကြားခဲ့ပါသည်။
ဆက်လက်၍ အမေးအဖြေကဏ္ဍများပြုလုပ်ပြီး ''Healthy and Happy Life in the New Normal Era'' ဆွေးနွေးပွဲကို ရုတ်သိမ်းခဲ့ပါသည်။
